෴ හසියා ගේ නවාතැන ෴

හා හා දැන් කට්ටිය වාඩිවෙලා තැන්පත් වුනා නම්.අද හසියා කියලා දෙන්න යනනේ ලස්සන සුරංගනා කතාවක්.හා හා මේක සුරංගනා කතාවක් කිව්වට ඇත්තම ඇත්ත කතාවක්‍.ඔන්න එහෙනම් හසියා පටන් ගත්තා‍‍‍.......

ඔන්න එකෝමත් එක කාලෙක (එකදාස් නවසිය බර ගණන් වල වගේද දන්නෑ නේද?) එකොමත් එක රටක (ඔය එකෝමත් එක කෑල්ල කවුද දන්නෑ හොයාගත්තේ?අනිත් එක කොහෙද ඔය එකෝමත් එක රට තියෙන්නේ..?හසියා නම් දන්නේ නෑ....) හිටියලු ළමයෙක්.මේ ළමයා හරිම හරිම නරකයිලු.(ලු කියන්නේ හසියාත් මේ කතාව කියන්නේ මේ පොතේ තියෙන විදිහට හින්දා ඕන්....) හරිම දඟයිලු.ඉතිං මේ ළමය ඉගෙනීමට වැඩිය දස්ස කමක් එහෙමත් නෑලු.මෝඩ තකතූරු ගොන් වහන්සේ කෙනෙක්.(ඒ කවුද හෆ්ෆේ ඒ...???) කලොත් කරන්නේ විකාර වැඩක්මලු.ඉතිං මේ ළමයගේ යාළුවෝ පවා මේ ළමයට කිව්වේ පිස්සා කියලා ලු.ගිය තැන චොරලු.

ඉතිං ඔන්න දවසක් මිනිහට සෙට් වුනාළු අළුතින් යාළුවෝ ටිකක්.ඒ සිංහල බ්ලොග් මැරතන් එකකදී.(ඒහෙමත් ඒවා තියෙද?ඔව් ඔව් අර එකෝමත් එක රටේ එහෙම එව්වා තිබුණා නෙවැ....) ඒකත් සෙට් වුනේ වලියක් දාගෙන.වෙන එක්කෙනෙක්ගේ නමින් ඇවිත් චණ්ඩි පාට් දාන්න ගිහින් චා වුණා.හැබැයි ඔය සිංහල බ්ලොග් ලියපු ඒ සෙට් එක හරිම හොද කට්ටියක්.හරිම කරුණාවන්තයි.දයාබරයි.අවංකයි.(වැඩිද මන්දා මුරුංගා අත්තේ තිබ්බා...කරන්න දෙයක් නෑ මේ පොතේ තියෙන්නේ මෙහෙම.....) පින්වන්ත කට්ටියක් කෙලින්ම කිව්වොත්‍.("සේම් ෆෙදර් ෆ්ලොක් ටුගෙදර්" කියන්නේ ඕකට වෙන්න ඕනි මයේ හිතේ.....)ඉතිං මේ ළමයා මේ අයගේ ලිපි කියවන්න ගත්තා.මෙන්න බොලේ ටික දවසක් යනකොට මේ පොඩි එකාට හිතුනලු තමන්ගේම කියලා බ්ලොග් අඩවියක් පටන්ගන්න.(මාර ළමයෙක් ආ.....) දැන් ඔන්න මේ ළමයත් ඉතිං ලිපි ලියනවලු.ඉතිං අර අනිත් බ්ලොග් ලියන සහෝදර සහෝදරියොත් මේ ළමයට කොමෙන්ට් කරනවුලු.දිරිගන්නනවලු.අඩුපාඩු කියලා දෙනවලු.

දැන් තමයි හොදම හරිය ඔන්න.මෙහෙම ටික දවසක් යනකොට මේ ළමයා එකතුවෙනවා මේ බ්ලොග් ලියන අයගෙම සෙට් එකේ විශේෂ කට්ටියකට.ඒකිව්වේ අර වගේම හොද පිංවන්ත තුන්දෙනෙකුට.මේ අයගේ පොඩි විශේෂත්වයක් තිබුණා‍‍.ඉතිං ඒ නිසා ඔන්න අර ළමයත් එකතු වෙලා මේ හතර දෙනා හදාගත්තලු පොඩි සංගමයක්.(මලා....එහෙනම් බඩුම තමා.කොම්)දැන් කට්ටිය එකට වැඩලු.වැඩේ නැගලා ගියාලු.වැඩේ කියන්නේ මේ තුන්දෙනායි අර අනිත් බ්ලොග් ලියන හැමෝමයි එකතු වෙලා අර ළමයව යහමඟට ගත්තලු‍‍.දැන් මේ ළමයා හරිම හොදයිලු. කිකරුලු. කරුණාවන්තලු‍.ඔහොම කියන්නේ මේ ළමයම නෙවෙයි ඔන්න.එයාගේ අනිත් යාළුවෝ තමා ඔහොම කියන්නේ.(මොනාවුනත් ගෙදර අය කියන්නේ තාමත් මේකා නරකයි කියලමනේ....අනේ වාසේ වනේ වාසේ.....)

දැන් ඉතිං මේ ළමයට හොදම හොද යාළුවෝ ටිකක් ඉන්නවලු.මේ ළමයටත් පුදුම සතුටුයිලු.(සතුටු නැත්තේ කාටද ඉතිං පිරිවර සේනා වගේ යාළුවෝ ගොඩක් ඉන්නකොට....)ඉතිං ඔහොම හොදින් කාලේ ගෙවිලා ගියාලු.

දවසක් ඔන්න මේ ළමයා උදේ නැගිටල ආවලු වෙනදා වගේම බ්ලොග් කියවන්න.ඉතිං ඔන්න කියවන්න කැමති බ්ලොග් ඕපන් කර කර බලනවලු.මේන්න බොලේ මේ ළමයා ඉන්න සංගමයේ අනිත් අය මෙයාට හොරෙන් පෝස්ට් එකක් දාල.(ඔව් අනේ හැමෝම එකම පෝස්ට් එකක් දාලා තියෙන්නේ.....)ඒක දැක්කාම මේ ළමය‍ගේ ඇස් වල කදුළු පිරෙන්න වැඩි වෙලාවක් ගියේ නැතිලු.පව් නේ ඒ ළමයා.දැන් මේ ළමයා අඩනවලු හෝ ගාලා.අමාරුවෙන් දාලා තියනෙ පෝස්ට් එක කියෙව්වලු.දැන් තවත් ඇඩෙනවලු.(ඔච්චර මොකට අඩනවද නේද....)

මේ ළමයට තමන්ගේම කියලා සහෝදර සහෝදරියෝ නැතිලු.ඉතිං මේ ළමයා අර පෝසට් එක කියෙව්වාම දුක හිතුනේ ඒ ළමයට තමන්ගේම සහොදරියක් වගේ හිටපු කෙල්ලත් සහෝදරයන් වගේ හිටපු කොල්ලෝ දෙන්නත් එකතු වෙලා මේ ළමයව එදා උදේම පුදුම කරවලා.(දිනේ දාලා දෙන්නම්කෝ 2010/10/31 විතර.....) ඒ මේ ළමයාගේ උපන්දිනේට සුභ පතලා.ඇඩෙන්නේ නැද්ද ඉතිං මේ වගේ දේවල් ‍වෙනකොට.ඉතිං මේ ළමයට සතුට දරා ගන්න බැරිකමට තමයි ඇඩුනේ.(හිතුව නේද සංගමයෙන් පන්නලා...ඒ දුකට ඇඩුවා කියලා....)ඉතිං මේ ළමයට හිතුනලු "මගේම, සහෝදරිටත් සහෝදරයෝ දෙන්නටත් හැමදාමත් ගොඩාරියක් ආදරෙයි....හැමදාමත් මේ වගේම මගේ ළගින්ම ඉන්න...." කියලා, මේ ලෝකෙටම හයියෙන් කෑ ගහලා කියන්න.ඒත් කරන්න බෑනේ.එහෙම කලොත් මේ ළමයට ෆ්රී ටුවර් එකක් ලැබෙයි අංගොඩට.ඉතිං කට පියන් නිකන් හිටියලු.

ඉතිං ටික වෙලාවක් යනකොට අර දාපු පෝස්ට් වලට ප්‍රතිචාර හෝ ගාලා ගලාගෙන එනවලු.ඉතිං මේ ළමයට හරිම සතුටුයි ලු‍.ඉතිං මේ ළමයා කවදාවත් නොවිදපු අමුතුම සතුටකුත් හොදම හොද යාළුවෝ ගොඩකුත් එක්ක සතුටින් ඒ උපන්දිනය සැමරුවලු.

හෆ්ෆේ තව පොඩ්ඩෙන් මල ජංජාලයයි.කෂ්ටිය හසියගේ නවාතැනට එයි මේ ළමයගේ නම අහන්න....මෙන්න මෙතනින් සියළු විස්තර දැනගන්න බලාගන්න පුළුහන්....

1.) කතාවේ එන ළමයාගේ නම
2.) කතාවට පරිදි ළමයා එකතු වු සංගමය
3.) කතාවේ ආ ඒ සංගමයේ අනෙකුත් සාමාජිකයන්... (කෙල්ල, ‍පළමු කොල්ලා, දෙවන කොල්ලා)

ඔන්න ඉතිං කතාව හසියා කියලා ඉවරයි.කතාව චෝයිද?

මොකක්ද....හසියට ඇහෙන්නේ නෑ....

ඔය ඉස්සරහා එක්කෙනා කියන්නකෝ මෙකක්ද එයා කියන්නේ කියලා...

අහ් කේක්ද? ඉන්න බලන්න....ම්ම්ම්ම්ම්ම් කතාවෙනම් අන්තිමට නෑ කතාව කියවපු අයට කේක් දුන්නා කියලා....

ඉන්න ඉන්න දෙන්නම් කලබල නොකර...මෙයාලගේ බඩජාරී කමට කේක් නොදී හිටියෝත් එහෙම මෙතන කෂ්ටිය උද්ඝෝෂණ උපවාස කරන්න පටන්ගනියි.

අනිත් එක අර කතාවේ අන්තිමට මේ ළමයා ප.ලි‍. කොටසේ දාලා තියෙනවා මේ කතාව අහන් ඉන්න හැමෝටම කිරිබත් කැවුම් කොකිස් දොදොල් අතිරස මුංකැවුම් පැණි වලලු කෙසෙල් බිස්කට් කේක් බ්ලා බ්ලා....... දීලා කිරිතේ කෝපී කූල් ඩ්‍රින්ක්ස් බ්ලා බ්ලා... (නෑ නෑ හසියාගේ නවාතැනේ ඇඟරත්වෙන ඒවාට ඉඩක් නෑ.....) ඇති වෙනකම් දෙන්න කියලා.ඔන්න ඉතිං හසියාගේ නවාතැන හැමදාම කෂ්ටයගේ ආසාවන් දන්න හින්ද ලෑස්ති කලා ලෝකයේ ලොකුම රසකැවිළි මේසය.ඔන්න දැන් කලබල නොවී හෙමිහිට ඇති වෙනකම් කන්න.හා හා දැන් එන්නකෝ ඔය පැත්තේන් පේලියට රස කැවිළි මේසේ ගාවට.ඔය ඔය ඉතිං පොරකන්න එපා.ඔන්න රස කැවිළි මේසේ තියෙනවා.ඕනි විදිහට කන්න පුළුහන් කවුරුත් මුකුත් කියන්නේ නෑ.හැබැයි ඔන්න රස කැවිළි අහක දාන අයටනම් හසියගෙන් දැඩි දඩුවම්.

අහ් තව දෙයක් අර ළමයට සුභ පතපු හැමෝටමයි, දැන් මේ රස කැවිලි මේසය ළග පොර කකා අනුභව කරන කට්ටියටයි, මුණුපොතේ සුභ පතපු හැමෝටමයි, ඉ-මේල් ව‍ලින් සුභ පතපු හැමොටමයි, කෝල් කරල සුභ පතපු හැමෝටමයි, ‍මැසේජ් වලින් සුභ පතපු හැමෝටමයි හදවතින්ම ස්තූති කරලා තියෙනවා.

එහෙනම් හසියා වාෂ්ප වෙන්න කියලා....

නෑ නෑ අද වාෂ්ප වෙන්නේ නෑ...හසියත් රස කැවිළි මේසේ ළගට එන්න හදන්නේ....ඇයි අනේ හසියගේ කටත් රිදෙනවා මෙයාලට කතා කියා දීලා.(හසියා පව්නේ.....)

කෝ එහෙනම් අර සංගමේ තුන්දෙනා හදපු සිංදුව දැම්මනම්.......අහ් අන්න හරි......